Missa pro fidelibus defunctis

Introitus

Requiem eternam dona eis Domine,
et lux perpetua luceat eis.
Te decet hymnus, Deus, in Sion,
Et tibi reddetur votum in Ierusalem,
Exaudi Deus orationem meam,
Ad te omnis caro veniet.

Kyrie

Kyrie eleyson, Christe eleyson, Kyrie eleyson.

Graduale

Si ambulem in medio umbrae mortis,
Non timebo mala,
Quoniam tu mecum es, Domine.

Virga tua et baculus tuus,
Ipsa me consolata sunt.

Tractus

Sicut cervus desiderat ad fontes aquarum,
Ita desiderat anima mea ad te, Deus.

Sitivit anima mea,
Ad Deum fortem vivum,
Quando veniam et apparebo
Ante faciem Dei mei.

Fuerunt mihi lacrimae meae,
Panis die ac nocte,
Dum dicitur mihi per singulos dies,
Ubi est Deus tuus?

Offertorium

Domine Iesu Christe, rex gloriae,
Libera animas omnium fidelium defunctorum,
De manu inferni, et de profundo lacu
Libera eas de ore leonis, ne absorbeat eas tartarus,
Ne cadant in obscurum.
Sed signifer sanctus Michael
Repraesentet eas in lucem sanctam.
Quam olim Abrahae promisisti, et semini eius.
Hostias et preces tibi domine offerimus,
Tu suscipe pro animabus illis quarum hodie,
Memoriam agimus fac eas,
Domine de morte transire ad vitam.

Sanctus

Sanctus, Sanctus, Sanctus,
Dominus Deus Sabaoth,
Pleni sunt celi et terra,
Gloria tua,
Osanna in excelsis.

Benedictus

Benedictus,
Qui venit in nomine Domini,
Osanna in excelsis.

Agnus Dei

Agnus Dei.
Qui tollis peccata mundi,
Dona eis requiem.
Agnus Dei.
Qui tollis peccata mundi,
Dona eis requiem.
Agnus Dei.
Qui tollis peccata mundi,
Dona eis requiem sempiternam.

Communio

Lux eterna luceat eis Domine,
Cum Sanctis tuis in eternum,
Quia pius es.
Requiem eternam dona eis Domine,
Et lux perpetua luceat eis,
Cum Sanctis tuis in æternum,
Quia pius es.